Deu 23 | NdeIBE | STEP | Loba ngubani owathenwayo ngokugxotshwa loba ukuxholoswa kavunyelwa ukungena ebandleni likaJehova.

Deuteronomy 23

Abangavunyelwayo

1 Loba ngubani owathenwayo ngokugxotshwa loba ukuxholoswa kavunyelwa ukungena ebandleni likaJehova.

2 Loba ngubani ozelwe ngobufebe loba izizukulwane zakhe kuze kube ngesetshumi, kavunyelwa ukungena ebandleni likaJehova.

3 Kakho um-Amoni loba owako Mowabi loba isizukulwane sakhe kuze kufike kwesetshumi, ozavunyelwa ukungena ebandleni likaJehova.

4 Kungenxa yokuthi abalihlangabezanga beliphathele isinkwa kanye lamanzi endleleni yenu ekuphumeni kwenu eGibhithe, bona basuka baqatsha uBhalamu indodana kaBhewori owePethori e-Aramu Naharayimu ukuba ehlisele isiqalekiso phezu kwenu.

5 Kodwa-ke, uJehova uNkulunkulu wenu kazangalalele uBhalamu kodwa waphendula isiqalekiso saba yisibusiso kini, ngenxa yokuthi uJehova uNkulunkulu wenu uyalithanda.

6 Lingadingi ukwakha ubungane labo ekuphileni kwenu konke.

7 Lingamenyanyi um-Edomi, ngoba ungumfowenu. Lingamenyanyi umGibhithe, ngoba laphila njengabezizweni elizweni lakhe.

8 Isizukulwane sesithathu sabantwana abazalwa lapho bangangena ebandleni likaJehova.

Ukungahlanzeki Ezihonqweni

9 Nxa lithobelene lezitha zenu ekuhlaseleni, xekelanani lakho konke okungahlanzekanga.

10 Nxa kukhona indoda phakathi kwenu ezichithele ngobudoda ebusuku, kumele iphumele ngaphandle kwezihonqo ihle iyehlala khonale. 11 Kodwa-ke akuthi ilanga selithambeka igeze, kuthi ke ngokutshona kwelanga ibuyele ezihonqweni.

12 Khethani indawo ngaphandle kwezihonqo lapho elizayela ngaphandle khona. 13 Wobani lolutho lokugebha kuthi lingaya ngaphandle, ligebhe igodi ligqibele leyongcekeza. 14 Ngenxa yokuthi uJehova uNkulunkulu wenu uyahambahamba phakathi kwezihonqo zenu ukuze alivikele ezitheni zenu. Izihonqo zenu kumele zibe ngcwele, ukuze angaboni lutho olungalunganga phakathi kwenu okuzakwenza alifulathele.

Eminye imithetho

15 Nxa isigqili sidinga ukuphephela kini lingasibuyiseli kumnikazi waso. 16 Siyekeleni sizihlalele lapho esifuna ukuhlala khona njalo sizihlalele kulelodolobho esifuna ukuhlala kulo. Lingasincindezeli.

17 Akungabi lowesilisa wako-Israyeli loba owesifazana ozakuba liwule lethempelini.

18 Lingaboletha inzuzo yowesifazana owulayo loba owesilisa owulayo endlini kaJehova uNkulunkulu wenu ezobhadala loba yisiphi isithembiso, ngoba uJehova uNkulunkulu wenu uyanengeka ngabo bonke.

19 Umfowenu ungamhlawulisi inzuzo, loba ngeyemali loba ngeyokudla loba yini engamlethela inzuzo. 20 Owezizweni lingamhlawulisa inzuzo, kodwa hatshi umfowenu ongum-Israyeli, ukuze iNkosi uNkulunkulu wenu alibusise kukho konke elikwenza ngezandla zenu elizweni elizangena kulo ukuba libe ngelenu.

21 Nxa lingenza isifungo kuJehova uNkulunkulu wenu, lingaphuzi ukusibhadala, ngoba uJehova uNkulunkulu wenu uzakufuna kini loba sekutheni njalo lizakuba lomlandu wesono. 22 Kodwa nxa lingayekela ukwenza isifungo kaliyikuba lomlandu.

23 Konke lokho okuphuma endebeni zenu kumele libe leqiniso ukukwenza, ngoba lenze leso sifungo ngokukhuleka lithembisa kuJehova uNkulunkulu wenu ngemilomo yenu.

24 Nxa lingangena esivinini sikamakhelwane wenu, lingadla wonke amagrebisi elifisa ukuwadla, kodwa lingafaki lelilodwa esitsheni senu. 25 Uma lingena ensimini kamakhelwane eyamabele, lilakho ukudobha okuwileyo ngezandla, kodwa limukani lingasebenzisi isikela emabeleni alokhu emi ngamahlanga.